2020年1月 - 月供部署

  呢幾日工作好忙碌，英文水平唔夠，經驗又未夠，做到好大壓力。咬緊牙關，捱過就係你嘅。幾忙都好，都係會花時間去理財，咁先可以將自己辛苦嘅勞動成果再一步滾大。平時返工比老闆壓榨，放工梗係壓榨返啲錢黎舒壓，務求令每一蚊係我訓教嘅時候都繼續為我工作。


  講完廢話，講下今次2020年第一個月供嘅部署先:



  0012同0016已經減供至各HKD 3,000，目的係慢慢降低返香港地產股比例。1038就繼續小注慢慢儲，望佢股息有繼續增長嘅空間，雖然呢排長和系真係靜曬，無曬deal，但咪細細注，儲下少少貨先。

  1928因為已經升到近年高位，所以會減供至HKD 3,000 (原先 HKD 4,500)，本人幾鐘意1928，主要原因係有高息且派息穩定，有波幅可賺價差(息率去到6厘左右就會分注一手手買)，不過亦都睇過1928同0027嘅回報比較，的確0027回報比較高，但由於0027股息太低，對我呢啲好息之徙真係有少少卻步，主要係無股息如果大波幅回落，驚自己坐唔穩，動作過多，造成虧損。 #知道自己弱點，對投資好重要。

  6823，無咩好講，純粹想供黎收下息，又兼有少少增長，股價無咩上落，前排落過10.9X，月供前又上返11.4，大戶一早準備好月供劇本比我地呢班點心，不過嚴守紀律，當然照供。

  1299同2318係第一次加入月供名單，前文就提及過想加多啲前峰比我個組合，呢兩隻會係保險陣營嘅前峰。其實我都覺得暫時無乜水位，但唔洗濕個頭，好難以接近歷史高位一手手咁接。之後如果有明顯回落，會透過月供倉或者獨立倉一手手咁增持，務求加大自己組合嘅增值能力。

#觀望緊科網前峰0700及9988

2019年組合回顧

踏入2020年，第一件事梗係review下上年組合嘅回報(低到離曬譜，得2%左右)，2019年底恆指埋單都有9.1%嘅升幅，而我只有2%... 所以咪要review下，到底我個組合衰乜。

編號	股票	成本價	現價	股數	現價值	已實現盈利	盈利額/虧損額	盈利率/虧損率	佔組合比例	行業	行業佔組合比例
12	恆基地產	$ 40.54	$ 38.25	1196	$ 45,747.00	$ 839.90	-$ 1,898.94	-3.92%	18.43%	地產	36.85%
16	新鴻基地產	$ 118.13	$ 118.50	263	$ 31,165.50	$ 714.10	$ 811.41	2.61%	12.55%	地產
144	招商局港口	$ 13.58	$ 13.32	2247	$ 29,930.04	$ 467.94	-$ 116.28	-0.38%	12.05%	港口	12.05%
1038	長江基建	$ 59.26	$ 55.35	264	$ 14,612.40	$ 284.09	-$ 748.15	-4.78%	5.89%	基建	5.89%
1373	國際家居零售	$ 1.79	$ 1.86	10000	$ 18,600.00	$ 0.00	$ 700.00	3.91%	7.49%	零售	7.49%
6823	香港電訊－Ｓ	$ 12.26	$ 11.00	1207	$ 13,277.00	$ 70.20	-$ 1,450.62	-9.80%	5.35%	電訊	22.44%
1883	中信國際電訊	$ 2.85	$ 2.83	15000	$ 42,450.00	$ 2,429.17	$ 2,129.17	4.98%	17.10%	電訊
2388	中銀香港	$ 31.44	$ 27.05	299	$ 8,087.95	$ 320.75	-$ 991.86	-10.55%	3.26%	銀行	3.26%
1928	金沙中國	$ 37.04	$ 42.75	1039	$ 44,417.25	$ 650.70	$ 6,583.39	17.11%	17.89%	濠賭	17.89%

現組合成本	$ 243,269.02
現組合總值	$ 248,287.14
總盈利額/總虧損 額	$ 5,018.12
總盈利率/總虧損率	2.02%

我諗大家都睇到，點解我呢個組合回報咁低。

1. 過多收息保守股: 收息、防守類型股份過多，基本上一隻前峰都無，只有金沙中國勉強叫行前少少嘅中場。沒有前峰球員，無人入波，梗係直接影響組合回報。所以，2020年將會為自己組合分注慢慢加入前峰，暫時已睇中嘅股份如下: 
科網: 700、9988
保險: 1299、2318
內房: 2007
消費: 1876、2319

對我黎講，現價安全邊際唔夠，一手手買一定唔會坐得舒服，所以黎緊呢個月會月供左1299 或 2318 或 兩隻都供。而其他果D都係會等安全邊際多少少先會分注買入。(睇上年個組合就知我好保守)

2. 過度集中香港企業: 由於2019年係香港嘅革命年，所以組合集中於香港企業嘅我當然無運行。即使香港現況係咁，我都係會繼續供恆基(持有最多農地)同新鴻基(香港建樓質素最好的建築商)。為左修補呢個過度集中嘅問題，2020年將會買入更多中國股票溝淡個組合(咁似香港政府做開嘅野...)，而上面提及嘅，大部分都係中國股票，亦都乎合到我目的。講到分散投資區域，其實我仲有手動月供美股，因為覺得美股依家升得太犀利，所以暫時每個月大概買3-5股 VTI。當然，每次話美股高位，都有人會拎果張圖出黎 (This is the top!)，但無辦法，個人膽細又保守 (之前輸驚左)，依家呢D位買太多真係坐得唔安樂，呢種不安嘅情緒好易令人做錯決定，直接影響長線投資部署。

最後，梗係set返個目標比2020年嘅自己:
目標 1: 組合回報率達 10%或以上。 (話易唔易，話難唔難，即管試下)
目標 2: 組合"前峰"球員需佔全組合 30%或以上。 (畢竟我都係一個後生仔，依家呢個組合真係太老)
目標 3 : 將組合變得更多元化，不要有單一行業佔全組合多於 30%。

下一篇，將會講2020年1月月供股票部署。

成立此Blog嘅目的

  先介紹一下自己，本人係一個澳門岩岩出身幾年嘅死令仔。由於人工唔高(兩萬令蚊)，但樓價好高(四四正正都要六百萬，首期百二+雜項大概都要一百五至一百八萬先上到樓)，篤一篤個計數機就知，不吃不喝都要七八九年先儲到首期，前提仲要係樓價唔再升。望住同我一齊左幾年嘅女朋友，真係不禁嘆左口氣。

  亦都因為咁而開始為自己搵出路，睇下有咩辦法可以擺脫呢個困局。初頭傻更更，跟左咩都唔識嘅老母炒外匯孖展，結果唔識問，當然輸到訓左係到。 (一共輸左五皮野，係我岩岩出黎做野果陣儲落半年嘅錢) 由於外匯市場係星期一至五 24小時運作，亦都由於孖展係會輸到斬倉或被要求補倉，基本上一持左倉，就唔會有教好訓。深夜一個聯儲局議息記錄已經可以令個市行幾百點，訓醒見到個倉輸成皮野，你咪話唔驚。其實我都唔係傻，輸得幾次，都會諗下辦法，例如嚴守止蝕、止賺，透過www.investing.com睇每個星期有咩經濟數據，睇下圖搵阻力位、支持位，但點做都係輸。玩到最癲果排，我覺得我自己係好似染左賭癮咁，每一個鐘都係到睇住佢上上落落，幾日無波幅就覺得好悶，無曬心情，一有大波幅，就會有好大壓力，即使係贏緊錢，因為你唔知下一秒個市會唔會轉勢急插(外匯係經常出現呢啲情況)。果一刻，我覺得比我贏到啲錢都係要拎去睇心理醫生，所以我決定quit炒外匯孖展。

  之後當然係痛定思痛，做下research，再決定點行落去。做research期間，先發現原來自己一直玩緊嘅外匯係號稱最難入手的投資 (當然有人會唔認同)。同時亦留意到幾個投資產品:債券、股票、基金。債券因為入場門檻高 (我知有債券ETF，入場門檻低啲，但個回報相比股票ETF好似有啲雞助...)，所以就即時放棄左唔諗，轉移目光至股票和基金。直到依家，我嘅投資工具全部都係股票(港股+美股)同埋基金(被動型ETF)。

  平時工作、應酬朋友、陪屋企人、陪女朋友，自己真係無乜自己比返自己，所以呢個blog主要係用作記錄我自己投資路的成長歷程，亦希望可以透過寫心路歷程嘅時間疏理一下自己嘅思緒。亦都作為自己進步嘅一個動力，無錯，畢業之後真係比讀書果陣懶左好多，無再花好多時間去睇書，研究新事物，再係咁落去，我會變成我公司入面果啲老屎忽，所以寫左呢個blog去push自己，畢竟網絡世界嘅野每個人都會睇到，都希望可以寫返啲比較有營養嘅內容出黎，等真係有人咁岩唔小心入左黎嘅時候，都叫有啲野可以帶走，而唔係睇到一堆bullshit。希望大家可以睇到本人投資上面嘅成長，亦都希望大家可以從我成長路上，參考到一啲你地需要嘅野。

利申: 大學讀社科，投資經驗大概三年，至今回報只有1.28% (as of 2019/12/31)....